— Æвæццæгæн, къæзæнæгæн йæ цæуæт
Сæ фыды хуызæн рауайынц къæзæнæг.
— Дæхицæн уæд — хуыздæр зонд дæм æрцæуæд —
Æнæсæртæ куы уаиккой дæ зæнæг.
1971 азы 22 июль
ХОХЫ
Къалиутæ ныдзæвынц хурыл,
Уидæгтæ та базылд дуры...
Кæнæ наз ныххæцыд дурыл,
Кæнæ дур ныххæцыд назыл.
1971 азы 24 июль
ДОНЫ ЗАРÆГ
Тæхы йæ зарæг хæхтæм комæй,
Æнусон уарзтыл зары дон,
Æндæр æм афтæ тынг бæстонæй
Нæ хъусиккой æхсæв уа, бон.
1971 азы 24 июль
ДÆ ХУЫЗÆН
Æртынд йæ заддæр дидинæг мæ хуымæн.
Æмбал нæ уыд йæ бакастæн, йæ хуызæн...
Кæд уарзон искæй, уæд æрмæстдæр уымæн,
Æмæ кæй уыдзæн истæмæй дæ хуызæн.
1971 азы 24 июль
БÆРКАД
Мæ хъуыды — фат, мæ риу та — фатдон,
Мæ зæрдæ — даргъ ивæзт æрдын...
Мæ хуымгæнд фестади бæркаддон, —
Куыристæ райдыдтон кæрдын.
1971 азы 24 июль
ИУ ÆМÆ БИРÆ
Чызджы фæуарзынц цалдæрæй дæр иумæ,
Чызгмæ фæкæсынц цалдæрæй æргом,
Фæлæ дзы уый та бахуды сæ иумæ
Æмæ дзы иумæ раздахы æргом.
1971 азы 24 июль
ТÆХУДЫ
Æрлæууыд хохау мах æхсæн дæ нана,
Фыдæнæн калы цъæх сыфтæртыл халас...
Уырызмæджы куыд аласта Сатана,
Мæн дæр ма демæ иу хатт афтæ алас!
1971 азы 24 июль
МАСТ ИСЫН
Бирæгъæй нæу уыйас тæссаг хъæды,
Афтæмæй дзы цас фæтæрсы, цас!
Маст исын цы лæгæн ис йæ хъæды,
Уымæй тынгдæр никæмæй у тас.
1971 азы 25 июль
ХЪАДЖДЖЫН
«Хъуаг æййафын, алцы хъаджджын — сонт!» —
Ратæхы дæ хъаст дæхицæй раздæр,
Фæлæ дын кæй нæ фаг кæны зонд,
Уый тыххæй нæма загътай ныхас дæр.
1971 азы 25 июль
МÆГУЫРÆЙ ХЪÆЗДЫГ
Ирон æмбисонды мотив
Мæн бафæрсынц арæх, куыдтæ цæрын, уымæй.
Æргомæй сын иу хатт æнæ зæгъгæ нæй:
«Мæгуырæй хъæздыг дæн, — нæ дзурын æрхуымæй, —
Хъæздыг дæн зæрдæйæ, мæгуыр та — дзыппæй».
1971 азы 1 август
АДЗАЛ
Нæ ралæууыд йæ сау дзыккуты адзал,
Нæ дзы фендæуыд иунæг хал дæр урсæй.
Йæхи адзал æнафоны фæраздæр.
Йæ цæсгом, мæгуыр, баззади фæлурсæй.
1971 азы 4 август
КÆЙ ХАРДЗÆЙ?
— Зæгъ-ма æргом, æмхуызонæй дæм хатæм,
Фæсныуæзт дæ цы фæриссы уæддæр?
— Мæхи хардзæй куы баназын, уæд — зæрдæ,
Кæйдæр хардзæй — фæцæйтоны мæ сæр.
1971 азы 5 август
ЗÆХХЫ ДÆР НÆ ФÆХУЫДУГ УЫДЗЫНÆН
Мæ ингæн мын куы бамбæрза цъæх нæуу,
Уæддæр мæнæн фæхуыдугæй тас нæу:
Сывæллоны ныййарæджы гуыбыны
Æнуддзинад кæд фæкодта йæ быны?!
1971 азы 7–8 август
ФЫДЫБÆСТÆ
Йæ чысыл хъæбултæн æфсæст у сæ цинтæй,
Ныртæккæ уал хъазынц йæ хъæбысы иумæ.
Фæстæдæр æй уыдон рæвдаудзысты минтæй,
Нылхъивдзæн æй алчидæр мадау йæ риумæ.
1971 азы 12 август
БÆЛЛИЦТÆ
Фæцæйтæхынц алкæд кæдæмдæр нæ разæй,
Сæ фæдыл иæуынæй нæ зонæм фæллад.
Бæргæ-иу фæуиккам мах искуы сæ разæй,
Фæлæ нæ æрвгæронау алидзынц дард.
1971 азы 13 август
ÆГАД
Тæссаг кæм вæййы, уым хъæддыхдæр лæуу, —
Лæгдзинад ничи равдисдзæн дæ бæсты...
Хъæбатырдзинад афтæ кадджын нæу,
Тæппуддзинад куыд æгад у нæ бæсты.
1971 азы 17 август
ЗÆЙЛАСТ ТУЛДЗ
Хуыссы æрвдзæфау комрæбын дыдæгътæй, —
Нæ лæууыд фидар иннæтау йæ къахыл...
Сæхи цаудыл куы нæ ауæрдынц хæхтæ,
Уæд ма куыд хъуамæ бацауæрдой махыл?!
1971 азы 17–18 август
БОН ÆМÆ ÆХСÆВ
Боны зынг ахуыссыд тары хъæбысы, —
Алчи та хурзæрин амондау мысы.
Саудалынг бафынæй боны хъæбысы, —
Иу дæр мæйдар æхсæв махæй нæ мысы.
1971 азы 31 август
ГОРÆТ ÆМÆ ХЪÆУ
Кæдæмфæнды мæ мæ фæндаг хонæд,
Дзæгъæлæй тас мын мæйдары нæу...
Кæддæр мæм хæхтæй нæ зынди горæт,
Ныр та мæм хæхтæй нæ зыны хъæу.
1971 азы 31 август
ХÆХХОН ДОН
Гыркъотæ хауы дæ гуылфмæ назæй,
Æддæуæзæй дæм фæлгæсы хъæд...
Дæ фæндаг лидзы дæуæн дæ разæй,
Æз та мæ фæстæ ныууадзын фæд.
1971 азы 31 август
РÆДЫД
Мæ сау рæдыдыл сæттын æргомæй:
Мæ зæрдæ баззад дæ цуры гомæй.
Бæргæ ма хæрын мæхи фæсмонæй,
Фæлæ кæд систи цæххы пут донæй?!
1971 азы 31 август
БАРОН
Дæуæн вæййын æппынæдзухдæр барон,
Мæ цуры фесты растдæр цыма зæд.
Мæхи ма ныр кæйдæртимæ цы барон,
Куынæуал дæн мæхи хуызæн дæр, уæд?!
1971 азы 14 сентябрь
ДÆ РУХС
Цæмæн барон дæу хурзæриныл? Уымæн
Вæййынц йæ тынтæ асæсты фæлурс...
Ды дæ мæ удæн афтæ зынаргъ уымæн,
Æмæ кæй хатын дардæй дæр дæ рухс.
1971 азы 17 сентябрь
ТАС
— Мæлæт мæ искуы баппардзæни арты,
Тæригъæд æм нæ разындзæн мæ хъæрмæ...
— Æрмæстдæр иу хатт чи ралæудзæн царды,
Цы кæсыс уымæ алы бон æнхъæлмæ?!
1971 азы 1 декабрь
МÆ УАЛДЗЫГОН ДИДИНÆГ
Æртонын дæ нæ бауарзта мæ цæст,
Хъуызгæ-ныгъуылгæ ацыдтæн дæ рæзты...
Куы нæ уыдаин ахæм зондыл хæст,
Уæд афтæ тынг нæ ахадис ныр цæсты.
1972 азы 7 мартъи
КÆРÆДЗИЙÆН
Æвронгæй йын нæй иунæг бон дæр фенæн,
Дæс азы дæр æм кæс æмæ йæ хъахъхъæн...
Хуыцау арахъхъ ысфæлдыста Ерменæн,
Ермен та райгуырд а зæххыл арахъхъæн.
1972 азы 30 июль
ФÆЛТАУ
Хæцыс дæ фырты сæрыл сыхмæ,
Кæй йæ бафхæрынц алкæд карз...
Фæлтау куы дзурис ды йæ ныхмæ,
Куы уаид сыхбæстæ йæ фарс.
1972 азы 4–5 ноябрь
НОЗТЫ МИНИУÆГ
Рагæй нырмæ нозтæй никуы уыдтæн разы,
Адæймагæн фестад худинаджы хос:
Хорз лæджы æвзæрæй авæры нæ разы,
Афтæмæй æвзæрæй никуы скæны хорз.
1972 азы 5 ноябрь
ФИДÆН
Нæ сиды махмæ иу ранмæ нæ фвдæн,
Æндæр кæмæндæр араздзынæ фынг.
Æвæццæгæн, нæй уарзтæн уарзтæй фидæн,
Æндæр ды дæр мæн афтæ уарзис тынг.
1972 азы 7 ноябрь
УСГУР
Дзурын æз мæхи хъуыдытæ, — уайдзæф дæр мыл уайæд, —
Раст дзурæджы алы хатг дæр царды хорзæх уæд:
Хорз хъуыддаг куы нæ бакæна адæймаг æррайæ,
Зондджынæй æрра хъуыддæггæ нал бакæвдзæн уæд.
1972 азы 8 ноябрь
Дата добавления: 2015-09-11; просмотров: 70 | Поможем написать вашу работу | Нарушение авторских прав |