|
Читайте также: |
Кæй фæнды, уый мæ нымайæд сонтыл:
Дæ цæстытæй мæм мæ фидæн разынд.
Кæны уæлахиз мæ зæрдæ зондыл,
Мæ зонд фыццаг хатт æдыхдæр разынд.
1971 азы май
УÆ ДЫУУÆЙÆ КÆЙ РАВЗАРОН, УЫЙ НÆ ЗОНЫН, ЗÆГЪГÆ, МЫН ЧИ ЗАГЪТА, УЫЦЫ ЧЫЗГÆН
Дунейы мин-мин чызджы астæу
Æз равзæрстон мæхицæн дæу,
Дæ бон та — а лæппуйæн мастæн —
Дыууæйæ иу равзарын нæу.
1971 азы 22–23 май
ÆВДИСÆН
Ныфсæн нæй тохы балбæласау тасæн,
Уæддæр фæтæрсы алчидæр йæхицæн:
Хъæбатыр иунæгæй æвдисæн у йæ тасæн,
Тæппудæн та — æгас дуне æвдисæн.
1971 азы 17 июль
СИДТ
Фæсидти хистæр: «Уæд сабыр нæ бæстæ!
Дунейы фарн нын ма зæгъæд æрмæст,
Æмæ фæндырдзагъд мауал хъуыса фæзтæй,
Æмæ рынимæ бамынæг уа хæст».
1971 азы 17 июль
ХÆСТЫ
Цы нæ хабар æрцæуы хæсты:
Къæдзæхы йас лæг фесты цъус...
Тæрхъусы хуызæн арсы бæсты
Хуыздæр у арсæнгæс тæрхъус.
1971 азы 17 июль
СÆР ÆМÆ АХСÆН
Æнæ нозтæй кæны йæ комдзаг маст ад.
Зыд гуыбынимæ зонд хæцынæй бастад.
Бæргæ ма уаид амондæн æрцахсæн,
Фæлæ, дам, сæры аныхъуырдта ахсæн.
1971 азы 17 июль
УАЦАРЫ
«Æрхондзæни дæ нозт фыддæрмæ,
Ныууадз æй, мауал дзы кæн сæндæг!»
«Æз æй куы ныууадзон, уæддæр мæ
Нæ ныууадздзæни уый йæхæдæг...»
1971 азы 17 июль
ХЪАЗÆН НЫХАС
— Мæнæй-уый нæ фæкодта ус курын рох, —
Ныр цалæм хатт дзурыс мæ хъусы?!
— Иæ чызджы дын фарон куы нæ радта Тох,
Уæд ма дын куыд ратдзæн йæ усы?!
1971 азы 18 июль
ЗЫНÆРВÆССОН
— Ныззæронд дæ, фæлæуу-ма иу хатт цырд!
— Кæй ракурон? Мæн аккаг Иры нæй...
— Кæдæй-уæдæй æцæг рауад дæ дзырд:
Нæ чызджытæ хуыздæр ысты дæуæй.
1971 азы 18 июль
НАМЫС ÆМÆ БАНДОН
Хæлæггæнджытæ нæй дæ зондмæ...
Дæ бадæн — хох, ныллæг — дæ кад.
Фæлтау дæ намыс сис бæрзондмæ,
Дæхæдæг къуындзихыл дæр бад.
1971 азы 19 июль
ЦАУТÆ ИВЫНЦ ТАГЪД КÆРÆДЗИ
Знон уыдтæн чындзхæссæг Ходы,
Абон уæлмæрдмæ цæуын...
Цины нал фæуæндын худын,
Зианы нал уæндын кæуын.
1971 азы 19 июль
ЗÆРДÆЙЫ МАРГ
Дæ амонд уыд, æмæ зæрдæйæ
Зæрдæмæ нæй æргом ныккæсæн,
Æндæр дис кодтаиккой адæм,
Дæ риуы цас марг бацыд, ууыл.
1971 азы 22 июль
Дата добавления: 2015-09-11; просмотров: 79 | Поможем написать вашу работу | Нарушение авторских прав |